2021-жылдын 25-март күнү Кочкор ройонунун Ак-кыя айыл өкмөтүнүн Кара-Суу айылында Германия кызматташтык уюму тарабынан жаштарга арналган тренинг болуп өттү.

Германия кызматташтык уюму (giz) «Жаштар үчүн жаркын келечек» долбоорунун алкагында көптөгөн жаштарга керек болгон мүмкүнчүлүктөрдү сунуш кылып келет. Тренингде Германия кызматташтык уюмунун өнүктүрүү маселелери боюнча адис Себастьян Гесс жана ыктыярчы Азамат Абдурахманов кененирээк маалымат беришти.
Долбоордун максаты жаштардын экономикалык жана коомдук жашоого катышуусуна багытталган саясатты жана чараларды жакшыртуу болуп эсептелет.

Учурдун талабына ылайык жумуш менен камсыз кылууну (жумушчу орундарды түзүүнү), социалдык коргоону, саламаттык сактоону жана билим берүүнү камтыган комплекстүү мамлекеттик программа абдан керек жана зарыл. Тренингдин жүрүшүндө адистер жаштар үчүн тил курстарын ачуу, 11-класстын бүтүрүүчүлөрү үчүн Жалпы республикалык тестирлөөгө даярдоо курстарын ачууга, кошумча окуу куралдарын алып берүүгө, айымдар үчүн жеке ишкана ачууга жардам берерин баса белгилешти.

Ошондой эле, бул долбоордо мүмкүнчүлүгү чектелген адамдарга дагы колдоо көрсөтүүлөрү айтылды. Тренинге Ак-Кыя айыл өкмөтүнүн башчысы, айыл жаштары, мугалимдер, айыл өкмөттүн социалдык кызматкери, Шапак медиа борборунун волонтёрлору катышты. Катышуучулар кызыккан суроолорун берип, аларга жооп ала алышты.

Аделя Тилек кызы
Айжаркын Эркинбек кызы